Friday, January 9, 2026
ການປະຣິວາສະກັມ ວັດປ່າໂພນເພົາ ຫລວງພຣະບາງ
ຄວາມເປັນມາຂອງປະເພນີ ການປະຣິວາສະກັມ ວັດປ່າໂພນເພົາ ຫລວງພຣະບາງ ການກຳເນີດຂອງ "ສັນຕິເຈດີ" ຄົນທົ່ວໄປເອີ້ນວ່າ ທາຕຸໂຄ່ງ ແລະປະຫວັດຂອງສາທຸໃຫຍ່ ຊາຍສະມຸດ ໂຊຕິໂກ.
ສາທຸໃຫຍ່ຊາຍສະມຸດ ໂຊຕິໂກ ກຳເນີດເມື່ອວັນພຸດ ແຮມ 9 ຄ່າ ເດືອນຍີ່ ປີຂານ ໃນວັນທີ 26 ມັງກອນ 1927 ເວລາ 20:30 ໂມງ ທີ່ບ້ານອະພັຍ ຕາແສງວິຊຸນ ເມືອງຫລວງພຣະບາງ ແຂວງຫລວງພຣະບາງ ເປັນບຸດຂອງເຈົ້າຊາຍທອງ ແລະເຈົ້າຍິງຄຳຂຳ ມີເຊື້ອເປັນຫລານຂອງເຈົ້າຣາຊະວົງ ( ສີສຸພັນ ) ໂຮງວັງຫລັງ , ແລະເປັນເຫລັນຂອງສົມເດັດພຣະເຈົ້າທິນທະຣະເທພະນິພພາທອນ ( ເຈົ້າມະຫາຊີວິດອຸ່ນຄຳ ) ເຊິ່ງມີພິີ່ນ້ອງຮ່ວມອຸທອນດຽວກັນທັງຫມົດ 4 ຄົນ ຄື :
1. ສາທຸໃຫຍ່ຊາຍສະມຸດ, 2. ເຈົ້າຍິງທອງສີ, 3. ເຈົ້າຍິງທອງວັນ, 4. ເຈົ້າຍິງທອງຈັນ.
ເມື່ອເຕີບໃຫຍ່ຂຶ້ນມາ ໄດ້ຮັບການສຶກສາທີ່ໂຮງຮຽນປະຖົມ ສຳນັກພຣະຣາຊວັງຫລວງພຣະບາງ , ເມື່ອບິດາເດີນທາງໄປຮັບຣາຊະການ ຢູ່ເມືອງປາກລາຍ ກໍ່ຕາມໄປເຂົ້າໂຮງຮຽນຢູ່ກັບພໍ່ ເມື່ອເກີດເຫດການ ໄທເຂົ້າຍຶດຄອງເມືອງປາກລາຍແລ້ວ ຄອບຄົວເພິ່ນກໍ່ເດີນທາງກັບຄືນມາຢູ່ເມືອງຫລວງພຣະບາງ ຈົນຈົບປະຖົມສຶກສາ
ເມື່ອອາຍຸຮອດ 20 ປີ ກໍ່ໄດ້ບວດເປັນພຣະພິກຂຸ ຢູ່ສຳນັກວັດໂພນສັງ ໄດ້ 6 ເດືອນແລ້ວລາສິກຂາລາເພດ ເພື່ອໄປຮັບຣາຊະການຢູ່ກະຊວງໂຍທາ ທີ່ນະຄອນຫລວງວຽງຈັນ.
ຮອດປີ 1957 ເຊິ່ງເປັນປີສະຫລອງ 25 ພຸດທະສັດຕະວັດ ( ປີ ພສ 2500 ພຸດທະຊະຍັນຕີ ) ຈຶ່ງມີສັດທາອອກບວດ ເພື່ອເປັນພຸດທະບູຊາພຣະຣັດຕະນະໄຕ ຈຶ່ງໄດ້ເຮັດເອກະສານຂໍລາພັກວຽກ ອອກບວດ 1 ປີ ໃນເວລານັ້ນເພິ່ນມີອາຍຸໄດ້ 30 ປີ ຈຶ່ງໄດ້ອຸປະສົມບົທ ທີ່ວັດອະພັຍ ໃນວັນທີ 06 ເມສາ 1958 ໂດຍມີສົມເດັດພຣະສັງຄະຣາຊ ທັມມະຍານະ ມະຫາເຖຣະເປັນພຣະອຸປັດຊາ , ສາທຸໃຫຍ່ທອງ ທັມມະທິນໂນ ວັດໝື່ນນາ ເປັນພຣະກັມມະວາຈາຈາຣຍ໌, ສາທຸໃຫຍ່ ອຸ່ນ ອິນທະປັນໂຍ ວັດເຕົາໄຫ ເປັນພຣະອະນຸສາວະນາຈາຣຍ໌ ຫລັງຈາກບວດແລ້ວ ກໍ່ມາຈຳພັນສາຢູ່ວັດຖ້ຳພູສີ ໄດ້ສຶກສາປະຕິບັດສິກຂາວິໄນພໍສົມຄວນແລ້ວ ຈຶ່ງໄດ້ເດີນທາງລົງໄປເຂົ້າປະຕິບັດວິປັດສະນາກັມມັດຖານ ຢູ່ສຳນັກວັດມະຫາ ພຸທທະວົງໂສກປ່າຫລວງ ນະຄອນຫລວງວຽງຈັນ ກັບທ່ານອາຈາຣຍ໌ໃຫຍ່ ມະຫາປານ ອານັນໂທ ພໍຄວນແລ້ວພຣະອາຈາຣຍ໌ໃຫຍ່ມະຫາປານ ກໍ່ໄດ້ສົ່ງໄປອົບຮົມ ວິທີການປະຕິບັດ ວິປັດສະນາທີ່ປະເທດພະມ້າ ແລ້ວກັບມາຊ່ອຍວຽກຢູ່ວັດໂສກປ່າຫລວງ ...
ຫລັງຈາກໄດ້ຮ່ຳຮຽນແລະປະຕິບັດທັມຢ່າງແຮງກ້າ ຈຶ່ງເກີດຄວາມຊາບຊືມ ໃນທັມມະ ແລະປະຕິບັດຢ່າງໜັກແໜ້ນ ແທນທີ່ລາພັກຣາຊະການພຽງປີດຽວ ກໍ່ເລີຍຖືເພດບັນພະຊິດ ສຶບຕໍ່ເລື້ອຍມາ ຈາກນັ້ນຈຶ່ງຂໍລາພຣະອາຈາຣຍ໌ໃຫຍ່ ມະຫາປານ ອານັນໂທ ຂຶ້ນມາຕັ້ງສຳນັກຢູ່ວັດປ່າໂພນເພົາ ເຊິ່ງຕອນນັ້ນເປັນວັດຮ້າງມາໄດ້ຫລາຍປີແລ້ວ ໃນຕອນຕົ້ນ ເພິ່ນໄດ້ກາງຕູບຢູ່ກ້ອງຕົ້ນເພົາ ເມື່ອມີໂອກາດ ກໍ່ໄດ້ເລິ່ມແປງສິມໃຫ້ພໍຢູ່ໄດ້ ຈຶ່ງຍ້າຍເຂົ້າໄປຢູ່ໃນສິມ
ປີຕໍ່ມາ ສາທຸໃຫຍ່ຄຳຈັນທຣ໌ ວັດແສນ ສຸຂາຣາມ ໄດ້ມາຖວາຍກະຖິນ ໃນມື້ 12 ເພັງ ໄດ້ເງິນ 70,000 ກວ່າພັນກີບ ແລ້ວໄປຊື້ເຮືອນຮ້າງຢູ່ບ້ານຜານົມ ມາຕັ້ງເປັນສາລາໂຮງທັມ ແລ້ວໄດ້ມີພຣະສົງ ແລະອອກຕົນຍາດໂຍມ ທີ່ເຫັນເພິ່ນປະຕິບັດດີ-ປະຕິບັດຊອບ ພາກັນມາຮ່ວມປະຕິບັດ ຮ່ວມສ້າງກະດິວິຫານ ຕູບກັມ ຫລາຍໆຢ່າງຂຶ້ນຕື່ມ ...
ສາທຸໃຫຍ່ຊາຍສະມຸດ ມີແນວຄິດຈະສ້າງພຣະທາຕຸ " ສັນຕິເຈດີ " ຈຶ່ງໄດ້ຊັກຊວນອອກຕົນຍາດໂຍມ ຈຶ່ງໄດ້ຂໍອະນຸຍາດທາງຣັຖະບານ ໄດ້ແລ້ວ ຕົກມາຮອດມື້ເພັງ ເດືອນ 6 ປີ ຄສ 1975 ຈຶ່ງໄດ້ນິມົນສົມເດັດພຣະສັງຄະຣາຊ ທັມມະຍານະ ມະຫາເຖຣະເຈົ້າ ມາວາງສິລາຣຶກ ແລ້ວສ້າງຂຶ້ນໃນປີນັ້ນ ຕົກມາຮອດທ້າຍປີປະເທດຊາດຈຶ່ງປົດປ່ອຍ ໃນຕອນນັ້ນ ສາທຸໃຫຍ່ຊາຍສະມຸດ ເພິ່ນໄດ້ຖືກແຕ່ງຕັ້ງໄປປະຈຳຢູ່ນະຄອນຫລວງວຽງຈັນ ໂຄງການກໍ່ສ້າງ ສັນຕິເຈດີ ຈຶ່ງໄດ້ຢຸດລົງຊົ່ວຄາວ ເມື່ອໄດ້ໂອກາດ ເພິ່ນຈຶ່ງຂໍລາມາສຶບຕໍ່ສ້າງພຣະທາຕຸ ຈົນໄດ້ຍົກຍອດເສຕະສັດແລ້ວ .
ປີ ຄສ 1983 ຄະນະສົງໄດ້ນິມົນໃຫ້ ສາທຸໃຫຍ່ຊາຍສະມຸດ ໄປຮ່ວມກອງປະຊຸມຢູ່ນະຄອນຫລວງວຽງຈັນ ເລີຍເກີດເປັນອຳມະພາດຢ່າງຮ້າຍແຮງ ພໍອາການດີຂຶ້ນແລ້ວ ກໍ່ປິ່ນປົວກັນເລື້ອຍມາ ແຂນອີກເບຶ້ອງຫນຶ່ງແມ່ນໃຊ້ການບໍ່ໄດ້ ເຖິງແນວໃດກໍ່ຕາມການສ້າງສາເຈດີສັນຕິ ກໍ່ຍັງສຶບຕໍ່ເລື້ອຍໆ...
ໃນຕອນນັ້ນສາທຸໃຫຍ່ຄຳຈັນທຣ໌ ວັດແສນ ສຸຂາຣາມ ໄດ້ກັບຈາກການໄປຢ້ຽມຢາມຍາດໂຍມ ພີ່ນ້ອງຢູ່ຕ່າງປະເທດມາ ໄດ້ປັດໄຈມາເປັນຈຳນວນເງິນ 6,500 ໂດຣາອາເມລິກາ ແລະຄຳ 2 ບາດ ມາຮ່ວມສ້າງຜາສາດແລະທ້າວທັງ 4 ໃສ່ເຈດີຈົນແລ້ວ ຫລັງຈາກນັ້ນຈຶ່ງໄດ້ເຮັດພິທີບັນຈຸ ພຣະບໍຣົມສາຣິຣິກະທາຕຸ ເຂົ້າບັນຈຸໄວ້ໃນອົງພຣະເຈດີສັນຕິ ໃນມື້ຂຶ້ນ 14 ຄ່ຳ ເດືອນຍີ່ ປີ ຄສ 1985 ໂດຍມີສາທຸໃຫຍ່ ຄຳຈັນທຣ໌ ເປັນປະທານໃນພິທີຄັ້ງນັ້ນ ແຕ່ກໍ່ຍັງມີສິ່ງທີ່ຕ້ອງຄວນເຮັດສຶບຕໍ່ຄື : ປະດັບປະດາຕົບແຕ່ງພາຍໃນພຣະທາຕຸ ໄດ້ແຕ້ມຮູບຊາດົກຕ່າງໆ , ສ້າງທັມມາສເທສະນາຢູ່ຊັ້ນ 3 ແລະທາສີທີ່ຍັງບໍ່ໄດ້ທາ ແບບກໍ່ສ້າງແມ່ນໄດ້ຈາກ ການອອກແບບຂອງທຸລຸງມະນີວົງ ຂັດຕິຍະຣາຊ ທີ່ເພິ່ນເລິ່ມອອກແບບໄວ້ເປັນບ່ອນປະດິດສະຖານພຣະບາງໃນພຣະຣາຊວັງຫລວງພຣະບາງ ແຕ່ກໍ່ບໍ່ໄດ້ນຳໄປໃຊ້ ສາທຸໃຫຍ່ຊາຍສະມຸດຈຶ່ງໄດ້ນຳເອົາແບບດັ່ງກ່າວນີ້ມາສ້າງແທນ ແລະປັບປຸງບາງຢ່າງໃຫ້ແທດເໝາະກັບການຈະເຮັດເປັນທາຕຸໂຄ່ງ ດັ່ງທີ່ເຮົາເຫັນທຸກມື້ນີ້ແລ ...
ສາທຸໃຫຍ່ ຊາຍສະມຸດ ເພິ່ນຕັ້ງຄວາມປາຖະນາໄວ້ວ່າ ຈະສ້າງວັດປ່າໂພນເພົານີ້ ໄວ້ເປັນສະຖານທີ່ ປະຕິບັດສະມະຖະວິປັດສະນາກັມມະຖານ ແລະສ້າງຕູບກັມໄວ້ ເພື່ອເປັນສະຖານທີ່ ໃຫ້ພຣະສົງແລະຜູ້ສົນໃຈໃນທັມ ໄດ້ເຂົ້າປະຕິບັດ ປະຣິວາສະກັມທີ່ວັດປ່າໂພນເພົາ ປະຈຳທຸກໆປີສຶບໄປ ... ຈົນກາຍມາເປັນປະເພນີຂອງຫລວງພຣະບາງທີ່ຕ້ອງສຶບທອດຕໍ່ໄປ...
ອາການອາພາດ ຂອງສາທຸໃຫຍ່ຊາຍສະມຸດ ເກີດມີອາການເຈັບໝາກໄຂ່ຫລັງ ກໍ່ເພິ່ມທະວີຂຶ້ນເລື້ອຍໆ ທ່ານໝໍ ດຣ ເຈົ້າຍິງທອງວັນ ເຊິ່ງເປັນນ້ອງສາວຂອງສາທຸໃຫຍ່ ພ້ອມດ້ວຍທ່ານໝໍໃຫຍ່ ທຸດທິວົງ ແລະທ່ານໝໍຫລາຍໆທ່ານ ກໍ່ໄດ້ເອົາໃຈໃສ່ເປັນທີ່ສຸດ ແຕ່ອາການກໍ່ຍັງຄົງຕົວແລະເຊື່ອມຖ້ອຍໄປເລື້ອຍໆ ພໍຕົກມາຮອດວັນທີ 19 ມິນາ 1992 ເວລາ 07:19 ໂມງ ກົງກັບວັນພະຫັດ ແຮມ 1 ຄ່ຳ ເດືອນ 4 ສາທຸໃຫຍ່ ຊາຍສະມຸດ ກໍ່ໄດ້ເຖິງແກ່ມໍຣະນະພາບລົງ ດ້ວຍອາກາດສະຫງົບ ຢູ່ໃນຫ້ອງ ພາຍໃນສິມຂອງວັດປ່າໂພນເພົາ ທ່າມກາງແວດລ້ອມໄປດ້ວຍພຣະສົງ ສາມະເນນ ພໍ່ຂາວ-ແມ່ຂາວ ຍາດໂຍມ ແລະຍາດພີ່ນ້ອງ ທີ່ມາຕິດຕາມອາການຂອງເພິ່ນ ລວມອາຍຸໄດ້ 65 ກັບ 1 ເດືອນ ແລະ 22 ວັນ ນັບພັນສາໄດ້ 34 ວັດສາ.
ຕອນຜູ້ຂ້າຍາມນ້ອຍ ຍຸກປີ 1978-1979 ຊາວບ້ານແຖວບ້ານຊຽງທອງ ຄີລີ ໂພນເຮືອງ ວັດແສນ ຈະພາກັນເຕົ້າໂຮມກັນແຕ່ເວລາ 3-4 ໂມງເຊົ້າໆ ພາກັນຫາບໃສ່ກະບຸງເອົາເຄື່ອງກິນ ເຄື່ອງທານຍ່າງຈາກບ້ານ ໄປວັດໂພນເພົາ ເພື່ອໃຫ້ທັນຈັງຫັນໃນຍາມບຸນອອກກັມ ຍັງຈື່ໄດ້ວ່າ ເວລາຍ່າງໄປກັບແມ່ເຖົ້າຈັນສຸກ ອຸດົມພົງ ເວລາຍ່າງໄປຮອດເຂດດິນແຄມທາງສຸສານປ່າຊ້າຝຣັ່ງ ( ດຽວນີ້ເພິ່ນປຸກ ເປັນຫ້ອງວ່າການປົກຄອງເມືອງຫລວງພຣະບາງ ) ຈະຢ້ານ ແຕ່ກໍ່ຍັງຢາກເຫັນບ່ອນຝັ່ງສົບຕາມແຄມທາງຍ່າງໄປຢູ່ ແຕ່ພໍຍ່າງໄປແຖວວັດປ່າຫຍ້າທຶບ ແມ່ນຈະຢ້ານຫລາຍກວ່າເພາະທັງມຶດທັງໜາວ ທັງມີຕົ້ນສັກໃຫຍ່ຫນາຕຶບກວ່າທຸກບ່ອນ ຕ້ອງກອດແມ່ເຖົ້າເອົາຜ້າປົກຫົວໄວ້ ຈົນຍ່າງຂ້າມຂົວຂ້າມຫ້ວຍແຖວປ້າຊ້ານັ້ນໄປ ຈຶ່ງເອົາຜ້າອອກ ແລ້ວຍ່າງໄປຮອດວັດໂພນເພົາກໍ່ເປັນເວລາ 6 ໂມງກຳລັງຈະແຈ້ງພໍດີ ແລ້ວຈັດແຈງອາຫານການກິນຖວາຍຈັງຫັນໃຫ້ພຣະສົງແລະກະກຽມໃສ່ບາດຢາດນ້ຳ ສຽງນົກ ສຽງໄກ່ຂັນ ແມ່ນຮ້ອງໃນຕອນນັ້ນ ແມ່ນອາກາດກໍ່ໜາວ ແຕ່ຄວາມສະຫງົບເຢັນ ເຫັນພຣະສົງທີ່ຍ່າງພິຈາຣະນາອະຣິຍາບົດຕາມລານວັດ ຍັງຈົດຈຳມາຮອດທຸກມື້ນີ້.
ການຮີບໂຮມຂໍ້ມູນນີ້ ໄວ້ເພື່ອເປັນທັມມະທານ ໃຫ້ກັບຜົນງານຄວາມປະຕິບັດດີປະຕິບັດຊອບຂອງບູຣະພາຈາຣຍ໌ ສາທຸໃຫຍ່ຄຳຈັນທຣ໌ ສາທຸໃຫຍ່ຊາຍສະມຸດ ແລະຜູ້ຄົນທັງຫລາຍທີ່ຮ່ວມກັນສ້າງຮີດຄອງປະເພນີ ເຈດີສັນຕິ (ທາຕຸໂຄ່ງ) ແລະສິ່ງຕ່າງໆໄວ້ໃຫ້ ເຊັ່ນຂົນດິນ ຂົນຊາຍ ໄປຊ່ອຍເປັນແຮງງານແລະປັດໄຈໃນການສ້າງ ເພື່ອໃຫ້ເປັນມູນມັງສັງຂະຫຍາ ເປັນແນວທາງໃຫ້ລູກຫລານພາຍຊ້ອຍໄດ້ຊື່ນຊົມໃຫ້ປະຕິບັດຕາມສຶບໄປ ...
ບຸນເຂົ້າປະຣິວາສະກັມ ວັດປ່າໂພນເພົາ ນະຄອນຫລວງພຣະບາງ ປະຈຳປີ ພສ 2568
ເຊິ່ງຈັດຂຶ້ນ ໃນລະຫວ່າງ ວັນທີ 18-30 ພະຈິກ(11) 2025 ມີພຣະອາຈາຣຍ໌ 10 ອົງຄ໌ + ພຣະເຂົ້າປະຣິວາສກັມມ໌ 59 ອົງຄ໌ ແລະສາມະເນນ ຈຳນວນ 18 ຕົນ.
Saturday, September 6, 2025
ປະເພນີບຸນຫໍ່ເຂົ້າສະຫຼາກ
+ມູນເຫດ ແລະ ຄວາມເປັນມາ (ອີງຕາມບາງເລື່ອງເລົ່າ)
ໃນອະດີດຕະການລ່ວງມາແລ້ວ ໄດ້ມີພຣະພຸດທະເຈົ້າອົງໜຶ່ງຊົງພະນາມວ່າ: ປະທະມຸດຕະຣະ ອາໄສຢູ່ໃນກຸງຫົງສາວະດີ ມະຫານະຄອນທານີ ເປັນທີ່ໂທຈອນທຽວບິນທະບາດ ຍັງມີສາມີພັນລະຍາຄູ່ໜຶ່ງ ເປັນຄົນອານາຖາເຂັນໃຈຢູ່ໃນພະນະຄອນ ມີອາຊີບຮັບຈ້າງຕັດຟືນຂາຍຕາມພາສາຄົນຍາກຈົນ ແຕ່ເປັນຜູ້ເຫຼື້ອມໄສໃນພຸດທະສາສະໜາ ຢູ່ມາວັນໜຶ່ງຜູ້ເປັນສາມີ ມາຄິດເບິ່ງວ່າການລ້ຽງຊີບຄືມີຄວາມຫຍຸ້ງຍາກແທ້? ຄົງຈະເນື່ອງມາຈາກຕົນບໍ່ໄດ້ບໍາເພັນກອງການກຸສົນ ບໍ່ໄດ້ໃຫ້ທານຮັກສາສິນ, ຟັງທັມມະ,ຈະເລີນທັມເມດຕາພາວະນາໃນຊາດປາງກ່ອນ ມາໃນຊາດນີ້ ຈຶ່ງເປັນຄົນຍາກຈົນເຂັນໃຈໄຮ້ຊັບອັບປັນຍາກໍເລີຍມີຈິດໃຈຢາກສ້າງກຸສົນ, ເຮັດບຸນກິນທານ, ເພື່ອເປັນການສ້າງຂຸມຊັບ ແລະ ສະບຽງອາຫານເອົາໄວ້ໃນຊາດພົບໜ້າ ຈຶ່ງໄດ້ປຶກສາກັບພັນລະຍາ ແລ້ວພັນລະຍາກໍເຫັນດີ ເປັນມູນຄ່າແລ້ວ ກໍພາກັນໄປຊື້ໝໍ້ເຂົ້າໜ່ວຍໜຶ່ງ, ໝໍ້ແກງໜ່ວຍໜຶ່ງ, ອ້ອຍ 4 ລໍາ, ກ້ວຍ 4 ໜ່ວຍ ນໍາມາຈັດແຈງແຕ່ງເຄື່ອງສໍາເລັດແລ້ວ ຈຶ່ງນ້ອມໄປສູ່ພະອາຮາມເຮັດເປັນສະຫຼາກກະພັດທານພ້ອມກັບຊາວບ້ານຄົນອື່ນໆ ສາມີພັນລະຍາຄູ່ນັ້ນ ຈົກສະຫຼາກຖືກ ພຣະພິຂຸສົງໜຶ່ງ ກໍດີໃຈຫຼາຍ ຈຶ່ງໄດ້ນ້ອມເອົາສະຫຼາກກາພັດທານຂອງຕົນໄປຖວາຍແລ້ວຫຼັ່ງນໍ້າທັກຂີໂນທົກ (ນໍ້າຕາ) ໃຫ້ຕົກລົງເໜືອແຜ່ນພື້ນພະສຸທາ (ແຜ່ນດິນ) ແລ້ວຕັ້ງຄວາມປາດຖະໜາວ່າ:“ເຕຊະບຸນກຸສົນຜົນທານນີ້ຂ້າພະເຈົ້າທັງສອງ ເກີດໃນພົບໃດໆກໍດີ ຂຶ້ນຊື່ວ່າຄວາມເຂັນໃຈໄຮ້ຊັບອັບປັນຍາເໝືອນດັ່ງຊາດນີ້ ຢ່າໄດ້ມີແກ່ພວກຂ້າພະເຈົ້າທັງສອງເລີຍ ຂໍໃຫ້ຂ້າພະເຈົ້າທັງສອງເປັນຜູ້ຮັ່ງມີ ພ້ອມໄປດ້ວຍຊັບສົມບັດ ສິນທານບໍລິວານລາບຍົດສັນລະເສີນສຸກ ແລະມີລິດເດດຢ່າງເຫຼືອຫຼາຍໃນພົບນີ້ ແລະ ພົບໜ້າເທີ້ນ”ຕໍ່ມາບໍ່ນານສາມີພັນລະຍາທັງສອງ ກໍໄດ້ຕາຍໄປ ແລະ ໄດ້ໄປເກີດເປັນເທວະບຸດເທວະດາ ໃນຊັ້ນດາວະດິງສະຫວັນ ສະເຫວີຍສົມບັດທິບ ອັນເປັນທີ່ຢູ່ໃນວິມານຜາສາດຄໍາ ເມື່ອຈຸດຕິຕາຍຈາກສະຫວັນກໍໄດ້ລົງມາເກີດເປັນບໍຣົມກະສັດສະເຫວີຍຣາດຊະສົມບັດ ຢູ່ໃນນະຄອນພຣານະສີມີນາມວ່າ: ພຣະເຈົ້າສັດທາດິດສະ ສະເຫວີຍຣາດຊະສົມບັດຢູ່ສີ່ໝື່ນແປດພັນປີ. ນີ້ແຫຼະຄືບຸນກຸສົນຈາກການໃຫ້ທານສະຫຼາກ ມີຜົນອັນຍິ່ງໃຫຍ່ໄພສານ ສາມາດນໍາທ່ານທັງຫຼາຍໃຫ້ໄດ້ຮັບຄວາມສຸກ ແລະ ຄວາມຈະເລີນ ທັງໃນພົບນີ້ ພົບໜ້າ ແລະ ພົບຕໍ່ໆໄປນັ້ນແລ້ວ.
ການໃຫ້ທານມີອານິສົງ 7 ປະການ ເປັນທີ່ຮັກຂອງຜູ້ຄົນທັງຫຼາຍ1, ເຮັດໃຫ້ຈິດຜ່ອງໃສ1, ລະຄວາມຕະໜີ່ຂີ້ໜຽວ1, ເປັນການຕໍ່ບຸນໃຫ້ຕົນເອງ1, ເປັນການອຸທິດສ່ວນກຸສົນເຖິງຜູ້ເປັນທີ່ຮັກລ່ວງລັບໄປ1, ເປັນຮັກສາຂະໜົບທຳນຽມປະເພນີຂອງຊາວພຸດ1, ເປັນການສືບຕໍ່ອາຍຸພຸດທະສາສະໜາ1, ການໃຫ້ທານຈະມີອານິສົງໄປໃນທາງມີໂພຄະຊັບ ແລະມີຮູບສົມບັດ ມີບັນທຶກໄວ້ໃນພຣະໄຕຣປີດົກໂດຍເບື້ອງຕົ້ນ ໄດ້ມີ ເທວະດາທູນຖາມພຣະຜູ້ມີພຣະພາກເຈົ້າວ່າ ບຸກຄົນໃຫ້ສິ່ງໃດຊື່ວ່າໃຫ້ກຳລັງ ໃຫ້ສິ່ງໃດຊື່ວ່າໃຫ້ວັນນະ ໃຫ້ສິ່ງໃດຊື່ວ່າໃຫ້ຄວາມສຸກ ໃຫ້ສິ່ງໃດຊື່ວ່າໃຫ້ຈັກຂຸ ແລະບຸກຄົນເຊັ່ນໃດຊື່ວ່າໃຫ້ທຸກສິ່ງທຸກຢ່າງ ພຣະຜູ້ມີພຣະພາກເຈົ້າຊົງຕັດຕອບວ່າ ບຸກຄົນໃຫ້ອາຫານຊື່ວ່າໃຫ້ກຳລັງ ໃຫ້ຜ້າຊື່ວ່າໃຫ້ວັນນະ ໃຫ້ຍານພາຫະນະຊື່ວ່າໃຫ້ຄວາມສຸກ ໃຫ້ປະທີບໂຄມໄຟຊື່ວ່າໃຫ້ຈັກຂຸ ແລະຜູ້ທີ່ໃຫ້ທີ່ພັກອາໄສຊື່ວ່າໃຫ້ທຸກສິ່ງທຸກຢ່າງ ສ່ວນຜູ້ທີ່ພ່ຳສອນພຣະທັມ ຊື່ວ່າໃຫ້ອຳມະຣິຕະທັມ ຜູ້ທີ່ໃຫ້ຂອງທີ່ພໍໃຈຍ່ອມໄດ້ຂອງທີ່ພໍໃຈ.
ສັປປຸຣິສະທານ ທານຂອງຄົນດີ ພຣະພຸດທະເຈົ້າສອນວ່າທານຂອງຄົນດີມີ 5 ຢ່າງ ຄື ໃຫ້ທານດ້ວຍສັດທາ1, ຈະເປັນຜູ້ມີຮູບສວຍງາມ ນ່າເບິ່ງ ນ່າເລື່ອມໃສ ປະກອບໄປດ້ວຍຜິວພັນທີ່ງົດງາມ. ໃຫ້ທານດ້ວຍຄວາມເຄົາຣົບ1, ຈະເປັນມີບຸຕພັນລະຍາທານມີຈິຕອະນຸເຄາະ1,ມີຈິດໃຈປານີດຂຶ້ນ ໄດ້ຮັບບໍລິໂພກກາມມະຄຸນທີ່ປານີດຍິ່ງຂຶ້ນ. ໃຫ້ທານບໍ່ກະທົບຕົນແລະຜູ້ອື່ນ1,ຈະເປັນຜູ້ມີໂພຄະຊັບທີ່ໝັ້ນຄົງ ບໍ່ມີໄພອັນຕະລາຍທັງປວງ ມາເຮັດອັນຕະລາຍບໍ່ໄດ້..ໆ
ເອວັງ ກໍ່ມີດ້ວຍປະກາລະຊະນີ້ແລ.
Monday, May 12, 2025
ວັນວິສາຂະບູຊາ
ໃນວັນເພັງ ຂຶ້ນ 15 ຄໍ່າ ເດືອນ 6 ເປັນຊ່ວງໄລຍະເວລາທີ່ແຕກຕ່າງກັນ ແລະ ຫ່າງກັນຫຼາຍປີ ເຊິ່ງເຫດການອັດສະຈັນທັງ 3 ນັ້ນໄດ້ແກ່:
1. ວັນວິສາຂະບູຊາ ເປັນວັນທີ່ພຣະພຸດທະເຈົ້າ ປະສູດ
ເມື່ອພຣະນາງສິຣິມະຫາມາຍາ ພຣະມະເຫສີຂອງພຣະເຈົ້າສຸດໂທທະນະ ແຫ່ງນະຄອນກະບິນລະພັດ ຊົງພຣະຄັນຄົບ 10 ເດືອນ ໃກ້ຈະເຖິງເວລາປະສູດຕາມປະເພນີນິຍົມຂອງຄົນອິນເດຍ ໃນສະໄຫມກ່ອນເວລາຈະເກີດລູກຜູ້ຍິງຕ້ອງກັບບ້ານເກີດຂອງຕົນເອງ ເພື່ອໃຫ້ກໍາເນີດບຸດ ໃນຂະນະທີ່ກໍາລັງເດີນທາງກັບບ້ານ ພຣະນາງໄດ້ແວ່ພັກຜ່ອນ ຢູ່ໃຕ້ຮົ່ມຕົ້ນສາລະ ທີ່ສວນລຸມພິນີວັນແລະພຣະນາງໄດ້ປະສູດພຣະໂອຣົດໃນທີ່ນັ້ນ ກົງກັບວັນເພັງຂຶ້ນ 15 ຄໍ່າເດືອນ 6 ປີ ຈໍ ກ່ອນພຸດທະສັກກະຣາດ 80 ປີ ປະສູດໄດ້ 5 ມື້ ໄດ້ຮັບການຕັ້ງຊື່ວ່າ ສິດທັດຖະ ແປວ່າ ສົມປາດຖະໜາ.
2. ວັນວິສາຂະບູຊາ ເປັນວັນທີ່ພຣະພຸດທະເຈົ້າ ຕັດສະຮູ້
ຫຼັງຈາກອອກບວດໄດ້ 6 ປີ ເມື່ອພະຊົນມາຍຸ 35 ພັນສາ ເຈົ້າຊາຍສິດທັດຖະ ກໍໄດ້ຕັດສະຮູ້ເປັນພຣະພຸດທະເຈົ້າ ຢູ່ທີ່ຮົ່ມຕົ້ນໄມ້ສີມະຫາໂພ ແຄມແມ່ນໍ້າເນຣັນຊະຣາ ເຂດອຸຣຸເວລາເສນານິຄົມ ໃນຕອນເຊົ້າຂອງວັນພຸດ ຂຶ້ນ 15 ຄໍ່າເດືອນ 6 ປີລະກາ ກ່ອນພຸດທະສັກກະຣາດ 45 ປີ ປັດຈຸບັນສະຖານທີ່ແຫ່ງ ນີ້ໄດ້ຊື່ວ່າ ພຸດທະຄະຍາ ເປັນເຂດຫນຶ່ງຂອງເມືອງຄະຍາ ແຫ່ງຣັດພິຫານ ປະເທດອິນເດຍ.
3. ວັນວິສາຂະບູຊາ ເປັນວັນທີ່ພຣະພຸດທະເຈົ້າ ປະຣິນິບພານ
ພຣະພຸດທະອົງໄດ້ຕັດສະຮູ້ ແລະສະແດງທັມມະເທສະໜາ ເປັນເວລາ 45 ປີ ຈົນມີພຣະຊົນມາຍຸ 80 ພັນສາ ເຊິ່ງໃນພັນສາສຸດທ້າຍໄດ້ຈໍາພັນສາຢູ່ທີ່ເມືອງກຸສິນາຣາ ພັກທີ່ ສາລະວະໂນທະຍານ ຫຼື ປ່າຕົ້ນສາລະ ເພື່ອສະເດັດດັບຂັນທະປະຣິນິບພານ ກົງກັບວັນອັງຄານຂຶ້ນ 15 ຄ່ຳ ເດືອນ 6 ປີ ມະເສັງ.
Wednesday, April 16, 2025
Tuesday, April 8, 2025
ວິທີການສົມມາພໍ່ເເມ່
15 ວິທີ ທີ່ຕ້ອງກຽມສົມມາພໍ່ເເມ່
2.ປັດໃຈໃຫ້ພໍ່ເເມ່(ຈະໃຫ້ທໍ່ໃດກໍ່ໄດ້)
3.ຊຸດໃໝ່
4.ຊາມໃບໃໝ່ໃສ່ນ້ຳລອຍດອກໄມ້ໃສ່ນ້ຳຫອມ
5.ຜ້າເຊັດມືຜືນໃໝ່
6.ຜ້າຂາວດິບ
7.ຖາດໃສ່ເຄື່ອງ(ວາງທັບດ້ວຍຜ້າຂາວດິບ)
8.ສະຖານພີທີຂໍຂະມາ(ຄວນເປັນບ່ອນເເຈ້ງ)
ວິທີຂໍຂະມາພໍ່ແມ່
1.ກ່ອນເຮັດພິທີຂໍຂະມາພໍ່ແມ່ ໃຫ້ອະທິຖານຈິດບອກສີ່ງສັກສິດຕ່າງໆ
“ອົງພະພຸດທະເຈົ້າ ລູກຊື່… ມື້ນີ້ລູກຕັ້ງໃຈຈະມາຂໍຂະມາ ຂໍອະໂຫສິກຳຈາກພໍ່ແມ່
ຂໍອົງພະພຸດທະເຈົ້າຈົງບັນດານໃຫ້ລູກເຮັດສິ່ງນີ້ໄດ້ສຳເລັດດ້ວຍເຖີ້ນ
2.ໃຫ້ພໍ່ເເມ່ນັ່ງຕັ່ງແລ້ວເຮົານັ່ງພື້ນ ເເລະ ກາບເພີ່ນ 3 ຄັ້ງ
3.ຍົກຕີນຂອບພໍ່ແມ່ມາລ້າງໃນຊາມທີ່ກຽມໄວ້
ໂດຍຂະນະທີ່ລ້າງຢູ່ໃຫ້ກ່າວຂໍຂະມາ
ກຳໃນສີ່ງທີ່ເຄີຍລ່ວງເກີນເພີ່ນທັງໃນອະດີດທີ່ຜ່ານມາແລະໃນອານາຄົດ ທັງກາຍ ໃຈ ວາຈາ ຫຼືສິ່ງທີ່ເຮັດໃຫ້ພໍ່ແມ່ບໍ່ສະບາຍໃຈ
ລູກກາບຂໍອະໂຫສິກຳໃນສິ່ງເຫຼົ່ານັ້ນດ້ວຍ
4.ຫຼັງຈາກລ້າງຕີນເເລ້ວນຳຕີນພໍ່ເເມ່ມາວາງທີ່ຂາຂອງເຮົາກ່ອນ
ແລະອະທິຖານພ້ອມບອກສິ່ງສັກສິດອີກຄັ້ງ
5.ຈາກນັ້ນກົ້ມລົງນຳຕີນເພີ່ນວາງເທີງຫົວຂອງເຮົາ
6.ຫຼັງຈາກນັ້ນນຳພານຂັນຫ້າມອບໃຫ້ເພີ່ນພ້ອມເວົ້າວ່າ
ພໍ່ເເມ່ເອີຍລູກຂໍຂະມາ ຂໍອະໂຫສິກຳ ຂໍຊີວິດໃຫມ່ທີ່ດີໃຫ້ລູກແນ່ເດີ
ກົດແຊຼໄວ້ເລີຍ
ຂໍ້ມູນຈາກພັດພາງາມ
(ຖ້າຈະກອັບປີ້ໄປລົງຕໍ່ຊ່ວຍໃຫ້ເຄດິດເເນ່)