ປະຫວັດຫຍໍ້ຂອງວັດ
ວັດພູຄວາຍໂພຄາຣາມ ຕັ້ງຢູ່ເທີງຈອມໜ່ວຍພູຄວາຍ ຂື້ນກັບບ້ານນາສ້າງເຫວີຍ ນະຄອນ-ຫຼວງພະບາງ ເຂດຊານເມືອງຂອງຫຼວງພະບາງ ເດີມທີວັດນີ້ເປັນປ່າດົງໜາເຕັມໄປດ້ວຍໝູ່ສັດນາໆພັນໃນນັ້ນມີຝູງຄວາຍປ່າຈຳນວນຫຼາຍ ແລະ ອຸດົມສົມບູນດ້ວຍພຶດພັນນາໆໄມ້ ເປັນອຸທິຍານຫຼວງຂອງພຣະມະຫາກະສັດໃຊ້ໃນການມາລ່າຍີງສັດຕາມຕີນພູແຫ່ງນີ້ໃນອະດິດ ສະຖານທີ່ນີ້ມີຄວາມສັກສິດ ແລະເກົ່າແກ່ຍາວນານມີຕຳນານເລົ່າຂານເຖີງຄວາມເຊື່ອຂອງຄົນຍຸກກ່ອນ ພາຍຫຼັງຍຸກຂອງພຣະເຈົ້າສັກກະລີນ ເປັນພຣະມະຫາກະສັດຂອງອາຈານຈັກລ້ານຊ້າງ ພຣະອົງຊົງມີພຣະຣາຊສັດທາໃຫ້ສ້າງວັດໃສ່ເທີງພູຄວາຍໜ່ວຍນີ້ ເພື່ອບໍ່ໃຫ້ເຊື້ອພຣະວົງ ຫຼື ເລົ່າເສນາອາມາດໄປລ່າຍີງສັດໃນດົງປ່າແຫ່ງນີ້ ຈົນຜ່ານມາຫຼາຍຍຸກສະໄໝ.
ວັດແຫ່ງນີ້ໄດ້ຮັບການບູຣະນະປະຕິສັງຂອນຄືນໃໝ່ໃນຍຸກຂອງ ພຣະເຈົ້າມະຫາຊີວິດ ສີສະຫວ່າງວົງ ເປັນອົງສາທຸນູປະຖັມ ຈົນມາຮອດຍຸກຂອງກະສັດອົງສຸດທ້າຍຫຼວງພະບາງ ກໍ່ຄື ພຣະເຈົ້າມະຫາຊີວີດ ສີສະຫວ່າງວັທທະນາ ແລະ ພຣະມະເຫສີ ຄຳຜຸຍ ໄດ້ໃຊ້ເປັນສະຖານທີ່ຈຳສີນພາວະນາ, ເຮັດບຸນສີນກີນທານ ສືບກັນມາຊ້ານານ ຕົກມາຮອດຊຸມປີ 1987 ສາທຸໃຫຍ່ ພຣະຫຼັກຄຳ ຈັນທະຣີນ ຈິນນະທັມໂມ ໄດ້ມາສືບຕໍ່ບູຣະນະປະຕິສັງຂອນ ສ້າງອາຣາມ(ສີມາ) ສ້າງສາລາໂຮງທັມຫຼັງໃຫຍ່ເປັນອາຄານອະເນກປະສົງ, ມີກຸຕິ ແລະອື່ນໆ ພາຍໃນວັດມີປ່າໄມ້ຂຽວສວຍງາມອ້ອມຮອບ ແລະ ປະຈຸບັນ ວັດແຫ່ງນີ້ຍັງເປັນທີ່ຕັ້ງຂອງ ໂຮງຮຽນ ມສ. ສົງແຂວງຫຼວງພະບາງ ມີອາຄານຮຽນ 2 ຊັ້ນ ຈຳນວນ 2 ຫຼັງ, ມີຫ້ອງຮຽນ ມ.1-ມ.7 ເປີດການຮຽນ-ການສອນ ທັງສາມັນສຶກສາ ແລະ ປະຣິຍັດສຶກສາຄວບຄູ່ກັນ ມີນັກຮຽນສົງຫຼາຍກວ່າ 900ອົງ ໂດຍແມ່ນ ສາທຸໃຫຍ່ ພຣະຫຼັກຄຳ ຈັນທະຣີນ ຈິນນະທັມໂມ ເປັນອົງນຳພາສ້າງອາຄານຮຽນຈົນສຳເລັດສ່ວນຮ້ອຍ ຫຼັງທີ່1 ໄດ້ຮັບການຊ່ວຍເຫຼືອຈາກລັດຖະບານລາວ ກໍ່ຄື ກະຊວງສຶກສາທິການ ແລະກິລາ, ອີກຫຼັງ 1 ໂດຍມີສາທຸໃຫຍ່ເປັນປະທານນຳພາສ້າງຂົນຂວຍປຸກລະດົມສັດທາທັງພາຍໃນ ແລະຕ່າງປະເທດ, ວັດພູຄວາຍໂພຄາຣາມ ປະຈຸບັນມີພຣະເນນຈຳພັນສາພຳນັກຢູ່ມີຈຳນວນປະມານ 160 ກວ່າອົງ ແຕ່ລະປີວັດແຫ່ງນີ້ຍັງໄດ້ຈັດງານປະຕິບັດທັມ-ວິປັສສະນາກັມມັດຖານ, ບວດເນນພາກລະດູຮ້ອນ, ອົບຮົມພຣະວິທະຍາກອນ, ອົບຮົມພຣະວິປັສສະນາຈານ, ອົບຮົມສີລະທັມ, ໄຫວ້ພຣະ-ສູດມົນຂ້າມປີ, ຈັດກິດຈະກຳການຮຽນຮູ້ຕ່າງໆອົບຮົມເຍົາວະຊົນ-ຊາວໜຸ່ມ, ອົບຮົມແລກປ່ຽນດ້ານຕ່າງໆ ທັງວຽກງານທາງສົງ ແລະ ບ້ານເມືອງອີກດ້ວຍ.
ກຳນົດການແຕ່ລະປີ: ຈັດງານອົບຮົມວິປັສສະນາກັມມັດຖານ ຊ່ວງພັກພາກຮຽນI ຊ່ວງກາງເດືອນ
ກຸມພາ(2) ຂອງທຸກໆປີ ແລະ ບັນພຣະຊາສາມະເນນຊ່ວງປີດພາກຮຽນII ຊ່ວງກາງເດືອນມິຖຸນາ(6) ຂອງທຸກໆປີ
ເບີຕິດຕໍ່:
02055673785
